کراچی: سہ فریقی سیریز کے اہم ترین میچ میں جنوبی افریقہ نے پاکستان کو 353 رنز کا ہدف دے دیا۔ کراچی کے نیشنل بینک کرکٹ اسٹیڈیم میں کھیلے جانے والے اس میچ میں جیتنے والی ٹیم 14 فروری کو نیوزی لینڈ کے خلاف فائنل میں مدمقابل ہوگی۔
جنوبی افریقہ نے پہلے بیٹنگ کرتے ہوئے 50 اوورز میں 5 وکٹوں کے نقصان پر 353 رنز بنائے۔ پروٹیز کپتان ٹیمبا باؤما نے ٹاس جیت کر بیٹنگ کا فیصلہ کیا۔ ویان ملڈر کے علاوہ باقی تمام کھلاڑیوں نے بہترین بلے بازی کا مظاہرہ کیا۔
ٹیمبا باؤما 82 رنز کے ساتھ آؤٹ ہوئے، جب کہ ٹونی ڈی زورزی نے 22 رنز کی تیز اننگز کھیلی۔ میتھیو بریزکے، جو اپنے ڈیبیو میچ میں 150 رنز بنا چکے ہیں، نے ایک اور شاندار اننگز کھیلتے ہوئے 83 رنز بنائے۔ ہینرک کلاسن نے 56 گیندوں پر 87 رنز کی جارحانہ اننگز کھیلی جس میں 3 چھکے اور 11 چوکے شامل تھے۔ کائل ویرینے نے 44 اور کوربن بوش نے 15 رنز پر ناٹ آؤٹ رہے۔
پاکستانی ٹیم کی جانب سے شاہین شاہ آفریدی نے 2 وکٹیں حاصل کیں، جبکہ خوشدل شاہ اور نسیم شاہ نے ایک ایک وکٹ حاصل کی۔
پاکستانی ٹیم میں انجری کے باعث حارث رؤف کی جگہ محمد حسنین کو شامل کیا گیا ہے، جب کہ کامران غلام کی جگہ سعود شکیل کو موقع دیا گیا ہے۔
جنوبی افریقہ نے ٹیم میں 4 تبدیلیاں کی ہیں، ٹونی ڈی زورزی، ہینرک کلاسن، کوربن بوش اور کیشو مہاراج کو پلیئنگ الیون میں شامل کیا گیا ہے۔
پاکستانی ٹیم کے کپتان محمد رضوان نے کہا کہ چیمپئنز ٹرافی سے قبل یہ اچھا موقع ہے۔ انہوں نے کہا کہ جنوبی افریقہ کے خلاف جیتی ہوئی سیریز ماضی کا حصہ ہے اور اس میچ کو جیت کر ہم چیمپئنز ٹرافی کے لیے مومنٹم حاصل کریں گے۔
جنوبی افریقہ کے کپتان ٹیمبا باؤما نے کہا کہ چیمپئنز ٹرافی سے پہلے اس میچ کو کھیلنے کا موقع اچھا ہے اور کلاسن کے آنے سے ٹیم کا اعتماد بڑھا ہے۔ ان کا کہنا تھا کہ اس وکٹ پر فاسٹ بولرز کو وکٹ لینا مشکل ہو گا۔
پاکستانی ٹیم: محمد رضوان (کپتان)، فخر زمان، بابر اعظم، سعود شکیل، سلمان علی آغا، طیب طاہر، خوشدل شاہ، شاہین شاہ آفریدی، محمد حسنین، نسیم شاہ، ابرار احمد
جنوبی افریقی ٹیم: ٹیمبا باؤما (کپتان)، ٹونی ڈی زورزی، میتھیو بریزکے، ہینرک کلاسن، کائل ویرینے، ویان ملڈر، کوربن بوش، سینوران متھوسوامی، تبریز شمسی، کیشو مہاراج، لونگی نگیڈی
